Bank Pensioners Life Certificate 2026: Ab NADRA Pak-ID Se Ghar Baithe Tasdeeq Ka Naya Tariqa
Mere apne walid sahib bhi pensioner hain, to mujhe achi tarah andaza hai ke har 6 mahine baad bank ja kar life certificate ke liye ghanton line me lagna kitna aziyatnaak hota tha. Buzurgon ke liye ye kaam sab se mushkil tha. Magar ab ye purani tension khatam. Hukumat ne is ka hal nikal diya hai.
Ab is ko Life Certificate nahi, balke Proof of Life Certificate kaha jayega. Aur sab se bari baat, ab ye bank kaam nahi raha. State Bank of Pakistan ne clear keh diya hai ke ab is ki zimmedari sirf NADRA ki hai.
Naya Nizam Kya Hai? Saal Me 2 Dafa Kyun Lazmi Hai?
Naye rules ke mutabiq ab har pensioner ko, chahe wo civilian ho ya military, har 180 din baad apne zinda hone ka saboot dena hoga. Matlab saal me 2 dafa lazmi. Agar aap ye verification nahi karwate to aap ki pension ko aarzi tor par rok diya jata hai taake ghalat istemal na ho.
Pehle ye tasdeeq sirf angoothay se hoti thi, ab NADRA ne facial recognition aur iris scan ka naya system shuru kar diya hai. Yani chehre se bhi tasdeeq ho jayegi.
Pak-ID App Se 2 Minute Me Ghar Baithe Kaise Hoga?
NADRA ne khud bataya hai ke sab se asaan tareeqa PakID mobile app hai. Pichle kuch dino me hi 1 lakh se zyada log is se faida utha chuke hain. Tariqa bohot simple hai.
Tareeqa 1: Khud Apne Mobile Se
1. Play Store se Pak-ID app install kar len.
2. Apna CNIC number likh kar account bana len.
3. Andar Proof of Life ka option nazar ayega, us par click karen.
4. Ab apna face camera ke samne layen, system foran aap ko NADRA record se match kar lega.
5. Bas, kuch seconds me QR code wala certificate aap ke samne hoga.
Tareeqa 2: Bete Ya Beti Ke Zariye
Agar walid sahib ya buzurg ghar se bahir nahi ja sakte to ye sab se behtareen sahulat hai. Aap apne PakID account se By Other Relatives par click karke unki jagah tasdeeq kar sakte hain. NADRA ne ye sahulat khaas taur par mazoor afraad ke liye di hai.
Fee Kitni Hai Aur Kahan Se Milega?
Shuru me is ki fee 20 rupay rakhi gayi thi, lekin ab pensioners ke liye ye bilkul free hai. Aap ko ek rupya bhi dene ki zarurat nahi.
1. PakID App se ghar baithe bilkul muft.
2. Qareebi 5000 se zyada e-Sahulat shop se muft.
3. 988 NADRA centers se muft.
Agar Angootha Kaam Na Kare To?
Ye masla 90% buzurgon ka hai. Umar ki wajah se fingerprint mit jate hain. Isi liye ab facial scan ko manzoori di gayi hai. Phir bhi agar koi shadeed aleel hai to purana manual tareeqa abhi bhi mojood hai, magar koshish karen ke digital hi kar len taake bank ke chakkar se bachen.
Akhir Me: Dekhen, ye chota sa kaam hai lekin agar time par na kiya to pension ruk jati hai aur phir dobara shuru karwane me mahina lag jata hai. Is liye behtar hai aaj hi 2 minute nikal kar ye certificate jama karwa den aur agle 6 mahine tak sukoon se rahen.