BISP Digital Wallet 2026: 1 Crore Khawateen Ko Free Bank Account, Agent System Khatam
Agar aap BISP ka paisa lene ke liye agent ke paas jati hain aur har dafa 500-1000 rupay katoti bardasht karti hain to ye khabar aap ke liye hai. 16 saal baad pehli dafa BISP ne is nizam ko hamesha ke liye khatam karne ka faisla kar liya hai.
Hukumat ne elan kiya hai ke 1 crore se zyada ghareeb khawateen ko pehli dafa free bank account diya jayega. Ab paisa agent ke through nahi, balke direct aap ke mobile wallet me ayega.
Z-Wallet Kya Hai Aur Ye Kaise Kaam Karega?
Minister of State for Finance Bilal Azhar Kayani ne Z-Wallet launch karte hue bataya hai ke 2026 ke akhir tak tamam BISP beneficiaries ko digital wallet de diya jayega. Is wallet ka naam Z-Wallet rakha gaya hai. Iska sab se bada faida ye hai ke ab aap ko line me lagne ki zarurat nahi. Aap ka 13500 ya 25000 ka payment direct aap ke wallet me transfer hoga, jise aap JazzCash, Easypaisa ki tarah use kar sakengi.
Free Bank Account Kaise Milega? Tariqa
BISP Chairperson Senator Rubina Khalid ne State Bank ke sath meeting me bataya hai ke account kholne ke liye aap ko kahin jane ki zarurat nahi.
1. Aap ke CNIC par khud ba khud digital wallet ban jayega.
2. Aap ko BISP ki taraf se SMS ayega ke aap ka wallet active ho gaya hai.
3. Aap qareebi e-Sahulat ya Bank se biometric karke apna paisa nikal sakengi.
4. Is account par koi fee nahi hogi, ye bilkul free hai.
Agent System Khatam Hone Se Kya Faida Hoga?
Pichle saal audit me 25 arab rupay se zyada ki be-zabtigiyan samne ayin thi, jahan 6 lakh se zyada na-ehal log paisa le rahe the. Agent system ki wajah se ghareeb khawateen ka paisa kata jata tha. Ab direct wallet se ye katoti 100% khatam ho jayegi. Aap ka pura paisa mehfooz rahega aur aap Scan & Pay se khareedari bhi kar sakengi.
Final Baat: Agar aap BISP beneficiary hain to apna original CNIC aur mobile number update rakhen taake aap ko wallet activation ka SMS time par mil jaye. Ye system June 2026 tak 100% digital ho jayega.